హైదరాబాద్ నగరాన్ని సుమారు 2,000 చదరపు కిలోమీటర్లకు విస్తరించాలనే ప్రతిపాదన వెనుక, ఈ నగరాన్ని కేంద్రపాలిత ప్రాంతంగా మార్చాలనే కుట్ర దాగి ఉందా అనే అనుమానం కలుగుతోందని బీఆర్ఎస్ శాసనమండలి సభ్యుడు దాసోజు శ్రవణ్ ఆందోళన వ్యక్తం చేశారు.
శాసన మండలిలో ఆయన మాట్లాడుతూ, రాష్ట్ర విభజన సమయంలో హైదరాబాద్‌ను కేంద్రపాలిత ప్రాంతంగా చేయాలని అప్పటి ఆంధ్రప్రదేశ్ పాలక వర్గం డిమాండ్ చేసిందని గుర్తు చేశారు. ఆ ప్రయత్నాన్ని తీవ్రంగా వ్యతిరేకిస్తూ కేసీఆర్ నాయకత్వంలో ఉద్యమం చేశామని, హైదరాబాద్‌ను తెలంగాణ రాజధానిగా నిలబెట్టుకున్నామని తెలిపారు.
అలాంటి చరిత్ర ఉన్న నేపథ్యంలో, ప్రస్తుతం హైదరాబాద్ నగర విస్తరణ వెనుక ఏదైనా లోతైన కుట్ర ఉందా అనే సందేహాలు తలెత్తుతున్నాయని ఆయన అన్నారు. ఈ అంశంపై ప్రభుత్వం స్పష్టమైన సమాధానం ఇవ్వాలని డిమాండ్ చేశారు.
హైదరాబాద్‌ను కేంద్రపాలిత ప్రాంతంగా చేస్తే తెలంగాణ ప్రజల నోట్లో మన్ను కొట్టినట్లేనని దాసోజు శ్రవణ్ తీవ్ర వ్యాఖ్యలు చేశారు. రైతుబంధు, పెన్షన్లు సహా ఏ సంక్షేమ పథకం అమలవ్వాలన్నా హైదరాబాద్ తెలంగాణలోనే ఉండాల్సిన అవసరం ఉందన్నారు.
హైదరాబాద్ నగరమే తెలంగాణకు జీవనాడి అని, ఈ నగరం నుంచే రాష్ట్రం బతుకుతోందని ఆయన స్పష్టం చేశారు. తెలంగాణ హక్కులు, స్వయంపాలనపై ఎలాంటి రాజీ ఉండబోదని హెచ్చరించారు.
